Policia e Kosovës ka njoftuar se nata e ndërrimit të moteve ka kaluar kryesisht e qetë, por në disa rajone janë raportuar disa incidente me lëndime dhe dëme materiale, si pasojë e përdorimit të pakujdesshëm të mjeteve piroteknike dhe armëve të zjarrit.
Gjithashtu, Policia njoftoi se nuk është raportuar asnjë rast apo incident me fatalitet, përfshirë këtu edhe aksidentet rrugore.
“Sipas raportimeve të pranuara nga të gjitha Drejtoritë Rajonale Policore (DRP), nata e vitit të ri, ndërrimi i motmoteve ka kaluar kryesisht e qetë, megjithëse në disa rajone janë raportuar disa incidente me lëndime trupore dhe dëme materiale si pasojë e përdorimit pakujdesshëm i mjeteve piroteknike dhe armëve të zjarrit. Nuk është raportuar asnjë rast apo incident me fatalitet, përfshirë këtu edhe aksidentet rrugore”, thuhet në njoftimin e Policisë.
Policia ka uruar që vit i ri të jetë vit i vazhdimit të bashkëpunimit dhe transparencës, gëzimit të lirisë dhe të drejtave njerëzore pa dallim, ku qytetarët e vendit jetojnë dhe veprojnë të sigurt dhe pa brenga.
“Policia e Kosovës është e përkushtuar për ruajtjen e rendit dhe sigurisë publike dhe ofrimin e shërbimeve të tjera për qytetarët, në pajtim me mandatin e saj ligjor dhe kushtetues”, thuhet mes të tjerash në njoftimin e Policisë.