Kryeministri i Kosovës, Albin Kurti ka thënë se Serbia nuk është e interesuar për një kompromis me Kosovën.
Kreu i qeverisë kosovare në një intervistë për “The Economist” ka theksuar se presidenti i Serbisë, Aleksandër Vuçiq e dëshiron ndarjen dhe se dëshiron kthimin në kohë.
“Vuçiq ende dëshiron ndarje, dhe ai flet sikur është “në kërkim të makinës së kohës… herë dëshiron të kthehet më 1999 e herë më 2007 [para shpalljes së pavarësisë së Kosovës], por ju e dini… treni është larguar nga stacioni. Nuk mund të kthehemi më atje, ka deklaruar Kurti.
Sipas “The Economist”, shumë prej diplomatëve e shohin Kurtin kokëfortë dhe kjo i ka humbur atij njëfarë mbështetjeje perëndimore, por politika e tij për të luajtur topin e ashpër me Vuçiqin ka dhënë rezultate, si aplikimi për anëtarësim në BE dhe çështja e liberalizimit të vizave.
Ndër të tjera, thuhet se arritja e një marrëveshjeje në mes të dy shteteve shihet problematike edhe në aspektin personal.
“Vuçiq dhe Kurti e përçmojnë njëri-tjetrin. Kur Vuçiq ishte ministër, Kurti ishte i burgosur politik në një burg serb; më 1 dhjetor, Vuçiq e quajti publikisht Kurtin “llum terrorist”. Mungesa e çdo raporti personal e bën shumë më të vështirë gjetjen e një marrëveshjeje”, përfundon “The Economist”.