Jeton Zulfaj, këshilltari i kryeministrit, Albin Kurti, ka thënë se rezistenca më e madhe që po i bëhet themelimit të Asociacionit të Komunave me shumicë serbe, është Qeveria.
Sipas tij, VV-ja edhe kur ishte në opozitë ishte fronti kryesor kundër Asociacionit.
“Sa ishin në qeveri opozita e tanishme, rezistenca më e madhe ndaj Asociacionit një-etnik ishte në opozitë e demonstruar më së miri në demonstratën gjithë popullore të thirrur nga Vetëvendosje! “Një popull nuk i nënshtrohet një njeriu”. Tash që janë në opozitë, rezistenca më e madhe ndaj Asociacionit mbetet qeveria”, ka thënë ai.
Zulfaj theksoi se Kosovës po i bëhet më shumë presion se sa Serbisë, pasi në Kosovë po shohin më shumë potencial për kompromise.
“Në Kosovë shohin potencial për kompromise e koncesione ndaj Serbisë më shumë jashtë qeverisë se sa në Serbi. Prandaj edhe i bëjnë presion më shumë Kosovës se sa Serbisë”, ka shkruar Zulfaj në Facebook.
Ai tha se pse duhet të paguajë Kosova çmimin për gënjeshtar e Vucicit, sipas tij “shkëputja e Serbisë nga Kremlini (shumë e dyshimtë, gjithsesi) është e mirë për vetë Serbinë, s’ka pse paguajmë ne për këtë”.
“Vuçiqi po e gënjen perëndimin që mund të shkëputet nga Kremlini. Por edhe nëse kjo është e vërtetë, pse Kosova duhet të paguajë çmim?”
Zulfaj theksoi se edhe pse në Kosovë janë mbi 93 për qind shqiptarë nuk ekziston asnjë institucion e agjenci qeveritare shqiptare, pasi Kosova u shpall shoqëri multi-entikne.
“Rrjedhimisht kushtetuta e Kosovës nuk ka paraparë asnjë institucion shqiptar e nuk mund ta parashoh e pranojë asnjë institucion serb, rom, boshnjak, turk, goran, ashkali, egjiptian. Është ligj i natyrës që një objekt gjatë udhëtimit të tij nga destinacioni A në destinacion B, ndjekë rrugën e rezistencës më të vogël (least resistance path)”, ka shtuar ai.