Sizmologu italian dhe presidenti i Institutit Kombëtar të Gjeofizikës dhe Vullkanologjisë, Carlo Doglioni, ka thënë se zhvendosja e pllakave tektonike që kanë shkaktuar tërmetet në Turqi, ka bërë që shteti të lëvizë përreth tri metra.
“Ajo që e quajmë ‘pllakë arabike’ ka lëvizur rreth tri metra përgjatë drejtimit verilindor-jugperëndimor, në relacion me pllakën anadollake”, ka thënë Doglioni, duke shtuar se ka pasur një zhvendosje të më shumë se tri metrave për përafërsisht 160 km.
Sipas profesorit italian, shumica e Turqisë qëndron në pllakën anadollake, mirëpo Turqia jugperëndimore kalon në pllakën Arabike, përreth Sirisë.
Më shumë se 5 mijë persona kanë mbetur të vdekur dhe dhjetëra mijëra të tjerë të lënduar si pasojë e tërmetit me shkallë prej 7,8 të Rihterit, i cili ka goditur Turqinë juglindore dhe Sirinë veriore mëngjesin e së hënës së 6 shkurtit.
Si pasojë e këtij tërmeti, janë shkatërruar më shumë se 5 mijë e 700 ndërtesa vetëm në Turqi.