Lëvizja Vetëvendosje, në dy-vjetorin e fitores në zgjedhjet e fundit parlametare ka thënë se nën qeverisjen e tyre Kosova ka pasur arritje në demokratizim, luftim të korrupsionit e reformim të institucioneve.
VV-ja, tha se me fitoren e 14-shkurtit qytetarët janë shpërblyer me një qeveri pa korrupsion.
“Me qeverisjen e re Kosova ka shënuar arritje në demokratizim, luftim të korrupsionit dhe reformim të institucioneve. Sakrifica e mijëra aktivistëve është shpërblyer e po shpërblehet me një shtet që nuk vjedh, me një shtet që i shpërndan rezultatet e rritjes ekonomike tek qytetarët, përmes pakove të rimëkëmbjes ekonomike, subvencioneve dhe mbështetjes së punësimit të të rinjve e grave”, thuhet në reagimin e LVV-së.
Sipas VV-së, fitorja me 14 shkurt nuk ishte përfundim por nisje e një projekti të rëndësishëm kombëtar.
“Rezultati i 14 shkurtit 2021 nuk ishte përfundim, por vetëm nisje e një projekti i cili do të jetë gjithmonë ngushtësisht i lidhur me idealet kombëtare e vlerat shoqërore të cilat i frymëzojnë aktivistët tanë dhe shumë nga qytetarët e Kosovës. Prandaj 14 shkurtin nuk e kujtojmë me nostalgji, por me energji. Ajo nuk është data kur mbaroi aktivizmi për të nisur zyrtarizmi, por data kur aktivizmi u zgjerua në mjetet e qëllimet e veta, për të mirën e Atdheut”, thuhet në njoftim.
Në zgjedhjet e fundit LVV-ja kishte arritur të fitonte mbi 50% të votave parlamentare.