Deputeti i Lëvizjes Vetëvendosje, Haki Abazi, i cili në mandatin e kaluar ishte emëruar zëvendëskryeministër i Kosovës, ka treguar se ishin marrë vesh me kryeministrin Albin Kurti që të vazhdohet njëjtë edhe në qeverinë e ardhshme.
Por, sipas tij, premtimin nuk e ka mbajtur Kurti, i cili, sipas tij, është arsyetuar se në zgjedhjet e 14 shkurtit 2021, ai nuk ka marrë shumë vota dhe për këtë arsye nuk është riemëruar në atë pozitë.
“Premtimi ka qenë që do të vazhdojmë njëjtë, dhe pas rezultateve, më ka thënë Kurti ‘ke marrë vota pak dhe nuk mund të përfshihesh në Qeveri’. Pyetja ime ka qenë se sa vota ka marrë Bislimi e Rizvanolli që s’kanë qenë pjesë e listës fare”, ka thënë ai.
Arsyeja se pse ai ka marrë pak vota, Abazi ka thënë se është për shkak të “luftës speciale” në rrjete sociale që është bërë kundër tij.
Ai ka thënë se ka pasur organizim që ai të eliminohet nga lista e deputetëve.
“Më vonë kam kuptuar luftën e brendshme speciale që është organizuar kundër emrit tim për të më eliminuar nga lista e deptuetëve, kjo është arsyeja që nga zv.kryeministri mezi arrita të bëhem deputet”, ka thënë ai.
Abazi ka deklaruar se deputetet Mimoza Kusari – Lila dhe Fitore Pacolli kanë tentuar që ai të mos emërohet në asnjë komision, derisa ka shtuar se emërimi i tij është bërë sepse kanë pasur frikë se nuk do ta votojë për presidente të Kosovës, Vjosa Osmanin.