Në prag të takimit midis kryeministrit të Kosovës, Albin Kurti dhe presidentit serb, Aleksandër Vuçiq, në Bruksel, ka reaguar drejtoresha e Fondit për të Drejtën Humanitare në Serbi, Natasha Kandiq.
Ajo i ka propozuar Vuçiqit, që takimin ta nisë me një deklaratë, që ka të bëjë me ndërtimin e një memoriali në Batajnicë, ku u groposën dhe dogjën kufomat e viktimave civile shqiptare të vrarë gjatë luftës në Kosovë.
Kështu ka shkruar ajo në një postim në llogarinë e saj në Twitter.
“Nëse takimi në Bruksel nis me deklaratën e Vuçiqit se Serbia do të ndërtojë një memorial në territorin e kampit të Njësisë Antiterroriste Serbe në Batajnicë në kujtim të 800 personave, të vrarë në Kosovë, të transferuar në kampin e policisë, ku përmes makinerisë dhe zjarrit u rrafshuan me tokë, do të fillonte ‘normalizimi’ i raporteve”, shkroi Kandiq.
Kada bi sastanak u Briselu počeo izjavom @avucic da će Srbija na prostoru kampa SAJ-a u Batajnici izgraditi spomen obeležje u znak sećanja na 800 ljudi, ubijenih na Kosovu, prebačeni u policijski kamp, gde su mašinama i vatrom sabijani u zemlju, počelo bi "normalizacija".
— Natasa Kandic (@natasakandic) February 23, 2023
Ndryshe, Kurti dhe Vuçiq, do të takohen më 27 shkurt në Bruksel në kuadër të dialogut, ku do të diskutojnë për propozimin e Bashkimit Evropian për normalizimin e raporteve.
Në faqen zyrtare të Zyrës për Politikë të Jashtme dhe Siguri, Josep Borell dhe Miroslav Lajçak, është bërë e ditur se fillimisht do të zhvillojnë takime të ndara me Kurtin e Vuçiqin.
Këto takime do të fillojnë në orën 15:00 dhe më pas do të ketë një takim të përbashkët.
“Në takim do të diskutohet për propozimin e BE-së për normalizim të raporteve në mes të Kosovës dhe Serbisë”, thuhet në njoftim.
Në fund të takimit bëhet e ditur se do të ketë deklaratë për media nga përfaqësuesi i lartë i BE-së, Josep Borrell.
Pjesëmarrjen në takim e kanë konfirmuar edhe Kurti edhe Vuçiq.
Ndryshe, përfaqësuesi i lartë i Bashkimit Evropian për Punë të Jashtme dhe Politikë të Sigurisë, Josep Borrell, ka thënë se shpreson që Kosova dhe Serbia të pranojnë propozimin evropian, si rrugë për normalizim të marrëdhënieve.