Kryeministri i Kosovës, Albin Kurti, ka njoftuar se Universiteti i Prishtinës dhe Akademia e Studimeve Albanologjike e Shqipërisë, e kanë nisur bashkëpunimin në katër fusha e që lidhen me studimet albanalogjike.
Kurti tha se këto marrëveshja janë tejet të rëndëishme e të nevojshme.
“Albanologjia dhe jo vetëm janë fusha për të cilat universitetet në Kosovë dhe Shqipëri duhet të kenë maksimumin e bashkërendimit dhe bashkëpunimit shkencor e profesional. Krahas marrëveshjeve që qeveritë tona i kanë në fushën e arsimit dhe në fushat e tjera, marrëveshjet dhe projektet e përbashkëta të universiteteve dhe profesionistëve në çdo fushë janë shumë të mirëpritura dhe të nevojshme”, ka shkruar ai.
Katër fushat e bashkëpunimit për të cilat njoftoi Kurti janë:
- Krijimin e grupeve të punës për hartimin e projekteve strategjike të përbashkëta në fushën e albanologjisë – përkatësisht në fushën e arkeologjisë, antropologjisë social- kulturore, historisë dhe atë të gjuhësisë.
- Ndërtimin e programeve të përbashkëta në studimet Master dhe Doktoraturë në fushën e albanologjisë – arkeologji, antropologji social-kulturore, histori, dhe të gjuhësisë.
- Krijimin e një platforme të përbashkët për shkëmbimin e stafit akademik në mes dy institucioneve.
- Hulumtime të përbashkëta për trashëgiminë kulturore në Kosovë dhe Shqipëri.
