Kryetari i Aleancës për Ardhmërinë e Kosovës, Ramush Haradinaj, të martën e 18 prillit ka përkujtuar përvjetorin e Betejës së Marecit dhe masakrës në Makoc. Në këtë datë Prishtina shënon Ditën e Dëshmorëve.
Me anë të një postimi në Facebook, Haradinaj ka thënë se sakrifica e të rënëve është gjithherë motivim për ta dashur atdheun e për ta ruajtur lirinë, teksa shton se ajo mban emrin e secilit prej tyre.
“Në këtë ditë kujtojmë dhe nderojmë trimërinë, vendosmërinë e sakrificën e luftëtarëve të Ushtrisë Çlirimtare, të Brigadës 153 Hyzri Talla, gueriljes BIA, si dhe gjithë dëshmorët e martirët”, shkroi ai.
Kreu i AAK-së tha se prilli i vitit 1999 për shumë familje të Llapit e Gollakut që kishin marrë rrugë për t’u shpëtuar masakrave nga armiku, u shndërrua në ditë krimi të paparë.
“Ushtria, policia dhe paramilitarët serbë në pritën që u kishin bërë, vranë dhe masakruan mbi 124 civilë të pafajshëm, duke mos kursyer fëmijë, vajza, djem, gra e pleq”, shtoi ai.