Ministrja e Ekonomisë, Artane Rizvanolli, në seancën e Kuvendit të Kosovës ku po diskutohet për zhvillimet e fundit në KEK i ka pyetur deputetët nga opozita se si është e mundur që ata të dinë kaq shumë rreth tenderave.
“Desha të pyes deputetët e opozitës pse keni pyetur për tenderat e korporatave të tjera dhe ju i dinit në detaje se kush është X dhe Y përfitues, por ne këtu kemi jetuar dhe e dimë si keni funksionuar. Desha të ju pyes se pse përgjatë këtyre dy viteve aq pak keni folur për politikat, por aq shumë dini për tenderat. Nuk do t’ju pyes, sepse ju njoh, andaj nuk ka nevojë për përgjigje”, ka thënë Rizvanolli.
Kësaj i është kundërpërgjigjur shefi i Grupit Parlamentar të PDK-së, Abelard Tahiri.
“Ministre bre, është e lehtë me pa se çfarë kontrate njëburimore ka nënshkru Nagip Krasniqi, qe dokumentin ku e kam. Kontrata njëburimore për sigurimin e objektit të KEK-ut 46 milionë, thu ti s’ka kompani tjetër të sigurimit. Ju ministre nuk guxoni me shkarku Nagip Krasniqin”, ka thënë Tahiri.
Përderisa ministrja replikoi me deputetin e PDK-së, Abelard Tahirin, ky i fundit u largua nga tavolina e tij dhe nga fundi i sallës e dëgjonte teksa fliste.