Presidentja e Kosovës, Vjosa Osmani, gjatë vizitës në Luksemburg është pritur në takim nga kryeministri Xavier Bettel.
Në një njoftim nga zyra e presidencës thuhet se temë e diskutimit në këtë takim ishte situata aktuale politike dhe e sigurisë në Kosovë, veçanërisht në veri të vendit, pas rrëmbimit të tre zyrtarëve policorë të Kosovës nga ana e Serbisë.
“Duke u ndërlidhur me zhvillimet e fundit në veri, Presidentja Osmani ka theksuar se është e domosdoshme përballja më drejtësinë e grupeve kriminale të mbështetura nga Serbia, të cilat e sulmuan Policinë e Kosovës, pjesëtarët e KFOR-it dhe EULEX-it, gazetarët dhe qytetarët”, thuhet në njoftim.
Presidentja theksoi nevojën e shtimit të angazhimit të ndërmjetësuesit të dialogut, Bashkimit Evropian, drejt zbatimit të plotë të marrëveshjeve të arritura sivjet në Bruksel dhe Ohër.
Më tej, Osmani tha se Kosova është e përkushtuar për paqe e stabilitet dhe se sfidat do t’i tejkalojë me partnerë dhe aleatë.
Presidentja e falënderoi kryeministrin Bettel për mbështetjen zhvillimore ofruar Kosovës, sikurse për liberalizimin e vizave.
Njëkohësisht, Osmani shprehu besimin për vazhdimin e mbështetjes në rrugën evropiane të Kosovës.