“…thashethemet e përdorura në audio-incizimet e transmetuara janë tendencioze dhe të pavërteta, duke aluduar për keqpërdorim të Rezervës Shtetërore dhe duke i shërbyer një kauze politike me qëllim të dëmtimit të procesit më të ndjeshëm për mbrojtje dhe siguri shtetërore…”
Ishte reagimi i Ministrisë së Industrisë, Ndërmarrësisë dhe Tregtisë në lidhje me përgjimet e publikuara në gazetën “Nacionale” gjatë kësaj jave rreth furnizimin me mallra rezervë (në këtë rast vaj dhe grurë) shtetërore .
Kështu, në emisionin “FIVE” në RVT Dukagjini nënkryetarja e PDK-së, Vlora Çitaku, i është kundërpërgjigjur MINT-it, duke thënë se ky reagim i tyre është “absolutisht qesharak” pasi “në botë dihet rezervat e arit, e lerë më të grurit dhe vajit”.
“Sekret është vetëm vendodhja e tyre, jo sasia dhe jo ku blihen ato. Për më tepër që ato audio-përgjimet që duken në sipërfaqe nuk kishte asnjë lloj sekreti për rezervat shtetërore, flisnin edhe shoferët e Ministrisë. Situata është jashtëzakonisht serioze, përtej skandale të njëpasnjëshme. Qytetari i Kosovë po vazhdon të varfërohet”, ka thënë Çitaku.