Presidenti i ShBA-së, Joe Biden, është zotuar t’i japë shtetit të Floridas çdo mbështetje që i nevojitet për t’u rindërtuar pas shkatërrimit nga stuhia tropikale Idalia.
Biden deklaroi kështu gjatë vizitës që pati atje, ku të paktën dy persona dihet se kanë vdekur pasi stuhia arriti në tokë të mërkurën.
Ai shtoi se asnjë person “inteligjent” nuk mund të dyshojë në ndikimin e ndryshimeve klimatike pas stuhisë.
Ndërkohë, guvernatori Ron DeSantis zgjodhi të mos takonte presidentin në udhëtimin e tij.
DeSantis kishte sugjeruar më herët se prania e Biden mund të pengonte përpjekjet për reagim ndaj fatkeqësive. Biden, i cili ka folur me DeSantis disa herë këtë javë, kishte thënë se do të takoheshin personalisht.
Por, një zëdhënës i DeSantis tha të premten se guvernatori nuk kishte plane të takohej me presidentin, duke shtuar se përgatitjet e sigurisë që kërkohen për një takim të tillë do të “mbyllnin përpjekjet e vazhdueshme të rimëkëmbjes”.
Biden vlerësoi DeSantis gjatë vizitës së tij të shtunën dhe tha se nuk ishte i zhgënjyer nga mungesa e guvernatorit republikan.
“Ai u ul me Agjencinë Federale të Menaxhimit të Emergjencave dhe vendosi se ku duhet të shkojmë, ku do të ishte pengesa më e vogël,” u tha Biden gazetarëve përpara një shtëpie të dëmtuar nga stuhia në qytetin Live Oak.
Biden u takua me Rick Scott, një nga dy senatorët republikanë të shtetit, dhe tha se ishte një shenjë “siguruese” që udhëheqësit e shtetit dhe autoritetet federale po punonin mirë së bashku, shkruan BBC.