Ministri i Mbrojtjes, Ejup Maqedonci, ka reaguar lidhur e zhvillimet e fundit në veri, ku sot është vrarë një zyrtar policor në orët e hershme të mëngjesit.
Maqedonci ka dënuar “sulmin terrorist” ndaj pjesëtarëve të Policisë së Republikës së Kosovës, duke shtuar se dorasit janë “kriminelë të dirigjuar nga Beogradi”.
“Veprime të tilla për eskalim të situatës nuk do të zmbrapsin organet e sigurisë për të kryer detyrën e tyre dhe as nuk do na bëjnë të ndryshojmë qëndrim në raport me Serbinë kur bëhet fjalë për interesat tona shtetërore”, ka shkruar ministri i Mbrojtjes.
Ai u ka shprehur ngushëllime familjes së politicit të vrarë Afrim Bunjaku dhe i ka uruar shërim të shpejtë policit të plagosur.
Këtë të diel, në një konferencë të jashtëzakonshme për media, kryeministri i Kosovës, Albin Kurti, ka dhënë detaje nga sulmi kriminal në veri të vendit, ku u vra një polic i Kosovës dhe një tjetër u plagos.
Ai ka thënë se brenda manastirit janë ende 30 persona të armatosur rëndë, të cilët po e sulmojnë vazhdimisht Policinë e Kosovës.
Lexo dhe: Kurti: 30 profesionistë ushtarakë po e sulmojnë Policinë, i ftoj sa më parë të dorëzohen
Kurti ka thënë se kriminelët janë të rrethuar nga Policia e Kosovës dhe se të njëjtit duhet të dorëzohen në organet e sigurisë së Kosovës.
Në këtë konferencë për media, Kurti ka publikuar disa fotografi nga Manastiri i Banjskës, ku shihet grupi paramilitar që sulmoi Policinë e Kosovës.
I pranishëm në këtë konferencë për media ishte dhe zëvendësdrejtori i Policisë së Kosovës, Fehmi Hoti, i cili ka bërë të ditur se grupi i armatosur afër Manastirit të Banjskës në Zveçan është rrethuar nga Policia e Kosovës.
Hoti ka bërë të ditur se një polic ka vdekur dhe dy të tjerë janë lënduar, njëri nga arma e zjarrit.
Lexo dhe: Hoti: Personat e armatosur janë të rrethuar, jemi në koordinim me KFOR-in
“Deri në këto momente janë dy policë të lënduar dhe një të vrarë. Deri në këto momente kemi të shtëna dhe kemi rrethuar objektin dhe deri tash nuk ka ndonjë raportim tjetër”, ka thënë Hoti.