Ambasadori i Shteteve të Bashkuara të Amerikës në Beograd, Christopher Hill, ka thënë se propozimi për normalizimin e marrëdhënieve në mes të Kosovës dhe Serbisë, “ka ca kohë që është në tryezë”.
Ai ka bërë thirrje që Kosova dhe Serbia të arrijnë marrëveshje sa më parë që të jetë e mundur, shkruan tanjug.
“E shihni, shumë po ndodhin në botë dhe unë mendoj se në aspektin e dialogut, marrëveshja duhet të jetë ashtu siç tha Lajçaku – sa më shpejt që të jetë e mundur. Ne e dimë se elementët e marrëveshjes kanë qenë në tryezë. Ka të bëjë Asociacionin e Komunave me shumicë serbe. Gjithçka është mjaft e qartë”, ka deklaruar Hill.
Ai ka thënë tutje se këto elemente janë diskutuar për një kohë të gjatë, por ato u theksuan veçanërisht gjatë takimit të Ohrit.
“Është vërtet koha për të përshpejtuar dhe për të ecur përpara,” u tha Hill gazetarëve kur u pyet nëse ShBA dhe BE kishin vendosur afatin përfundimtar për arritjen e një marrëveshjeje ndërmjet Kosovës dhe Serbisë.