Kryeministri i Kosovës, Albin Kurti, të enjten e 23 majit, ka njoftuar se ka përfunduar vizitën e tij zyrtare në Shtetet e Bashkuara të Amerikës(ShBA).
Me anë të një postimi në Facebook, Kurti ka theksuar se kjo vizitë ishte mjaft e frytshme.
“Vizitën time mjaft të frytshme në Shtetet e Bashkuara të Amerikës e përmbylla në New York, pas tri ditë takimesh të ndryshme në Massachusetss, Connecticut, Rhode Island”, ka shkruar Kurti.
Ai ka thënë se ka pasur nderin të jetë mysafir në World Affairs Forum, organizatë kjo me seli në Stamford të Connecticut, e cila nga viti 1946 organizon debate publike me liderë, diplomatë, ekonomistë, nobelistë etj., për tema globale në të cilat kanë rol të rëndësishëm në ShBA.
“Fola për të arriturat e qeverisë sonë dhe për dy qëllimet kryesore të vizitës sime në shtetin mik dhe aleatin tonë më të rëndësishëm: nxitjen e interesimit për investime në Kosovë dhe avancimin e bashkëpunimit me qeverinë amerikane në fushën e mbrojtjes dhe sigurisë”, ka thënë më tutje Kurti.
Ai më tutje ka shtuar se i ka bërë ftesë biznesmenëve amerikanë, edhe atyre shqiptaro-amerikanë, që të investojnë në Kosovë për ndërmarrje fitimprurëse për ta dhe për zhvillim edhe më të hovshëm socio-ekonomik për Republikën e Kosovës.
“Në Massachusetss pata kënaqësinë të pritesha në takim nga guvernatori i këtij shteti, Charles Baker. Biseduam rreth mundësive për investime dhe për angazhimin e thellimin e bashkëpunimit me komunitetin shqiptaro-amerikan në Massachusetts”, ka shkruar ai.
Shefi i ekzekutivit ka thënë se me ftesë të profesorit Michael Kennedy dhe Institutit Watson, ka mbajtur një ligjëratë e pastaj një bashkëbisedim të hapur me studentët dhe profesorët e Universitetit Brown, në Rhode Island, për aktivizmin, demokracinë dhe pushtimin ilegal të Ukrainës nga Rusia.
“Theksova se tani është më e rëndësishme se kurrë që demokracitë e botës dhe qytetarët e tyre të qëndrojnë të bashkuar”, ka theksuar Kurti.
Ai ndër të tjera, ka thënë se ka pasur edhe takim produktiv me drejtuesit e New York Medical College, së bashku me ministrin e Shëndetësisë, Rifat Latifi.
Ai, gjithashtu, ka bërë nderime te varret e dy shkrimtarëve, Fan Noli dhe Faik Konica në Boston, ndërsa në Yonkers të New Yorkut, ai është ndalur për nderime të varret e tre vëllezërve Bytyqi.
Ai ka thënë se është takuar edhe me anëtarësinë e shoqatës më të vjetër shqiptare në ShBA.
“Në kuadër të iniciativës së qeverisë sonë për Dialogun me Mërgatën, në Bronx dhe Staten Island, takova mërgimtarët tanë që jetojnë në këto pjesë të New Yorkut. Së bashku diskutuam sukseset e shumta të vitit tonë të parë në detyrë dhe strategjinë për përfshirjen e mërgatës si kontribuese thelbësore në progresin e mëtejmë të Kosovës”, ka shkruar Kurti.
Postimin e tij, Kurti e ka përmbyllur “Për rëndësinë e diplomacisë kulturore dhe ndërlidhjen e artistëve të Kosovës me artistët e mërgatës tonë, bisedova me artistë të fushave të ndryshme, të cilët i takova në New York, në një pritje të organizuar nga fotografi ynë i mirënjohur, Fadil Berisha”.
Ndryshe, vizitën e tij zyrtare në ShBA, Kurti e ka filluar me gjashtë maj.
Ndërkaq, kjo ka qenë vizita e tij e parë zyrtare në ShBA që nga marrja e mandatit si kryeministër.
Ndërsa, të hënën pas përfundimit të vizitës së tij në ShBA, ai ka udhëtuar drejt Zvicrës për të marrë pjesë në Forumin Ekonomik Botëror, që do të mbahet në qytetin Davos.