Kryetari i Partisë Demokratike të Kosovës, Memli Krasniqi, këtë të enjte është takuar me Komisionerin e Bashkimit Evropian për Fqinjësi dhe Zgjerim, Oliver Varhelyi.
Ky takim është zhvilluar në kuadër të vizitës së Krasniqit në Bruksel.
Gjatë takimit është diskutuar për procesin e integrimit evropian të Kosovës.
“Gjatë vizitës sime në Bruksel, takova edhe Komisionerin e Bashkimit Evropian për Fqinjësi dhe Zgjerim, Oliver Varhelyi. Bashkë diskutuam për procesin e integrimit evropian të Kosovës dhe rëndësinë që shteti ynë të mos lihet mbrapa në këtë proces”, ka shkruar Krasniqi në Facebook.
Sipas tij, për shtetin dhe qytetarët e Kosovës, është tejet e nevojshme që perspektiva evropiane të jetë e qartë dhe e prekshme.
“Për PDK-në, anëtarësimi i Kosovës në Bashkimin Evropian dhe institucionet euro-atlantike, është vizioni, misioni dhe rruga e vetme përpara”, shtoi më tej ai.