Ka filluar një proces tjetër gjyqësor në Gjykatën Themelore në Prishtinë, ndaj të akuzuarit për krime lufte, Zoran Vukotiq.
Por, gjykimi është mbyllur për publikun.
Gjykatësja e rastit, Violeta Namani, ka thënë se shkak i mbylljes së seancës është mbrojtja e jetës dhe e të dhënave personale të së dëmtuarës në këtë rast.
Paraprakisht, propozimin për mbyllje të këtij gjykimi për publikun e ka bërë prokurorja speciale, Drita Hajdari, pasi, sipas saj, në rast se gjykimi mbahet i hapur për publikun, krijohen pasoja të pariparueshme për të dëmtuarën.
“.. rasti është mjaft sensitiv, ju e dini që në këtë lëndë ekziston edhe masa mbrojtëse me të cilën është ndaluar gjykimi publik, respektivisht është urdhëruar gjykimi jopublik. Arsyeja për këtë është mbrojtja e integritet të viktimës së dhunimit dhe me zbulimin e identitet të saj ishin shkaktuar pasoja të pariparueshme për personalitet dhe jetën e saj, kështu që kërkoj që ky gjykim të mbahet pa prezencën e publikut”, ka thënë prokurorja Hajdari.
Ky propozim nuk u kundërshtua nga mbrojtësi i Vukotiqit, avokati Lujubomir Pantoviq. Kurse, vetë Vukotiq ka thënë se për të është njëjtë, pasi në fund të procesit sërish dihet verdikti i gjykatës, duke u bërë publik i njëjti, raporton Betimi për Drejtësi.
Në fillim të seancës, gjykatësja Namani ka bërë të ditur se aktakuza ndaj Vukotiqit është ngritur më 4 tetor 2023, i cili ngarkohet se në bashkëkryerje ka kryer veprën penale “Krime lufte kundër popullsisë civile”, dhe aktualisht i emëruar si krim kundër njerëzimit.