Ministria e Financave i ka njoftuar komunat e Kosovës se kanë afat deri më 8 dhjetor për të vendosur për faljen e tatimit në pronë deri në vlerën prej 100 eurosh.
Dje përmes një vendimi, Gjykata Kushtetuese i ka dhënë të drejtë Ministrisë së Financave për faljen e tatimit në pronë deri në 100 euro për vitin 2023, duke thënë se komunave u takon të vendosin.
“Si rrjedhojë, komunat e Republikës së Kosovës janë njoftuar se deri më datën 08.12.2023 mund të vendosin rreth faljes së tatimit në pronë, e cila mund të lejohet deri në lartësinë e faturës së tatimit në pronë për vitin 2023, por jo më shumë se një qind (100) euro”, thuhet në njoftim.
Në njoftim thuhet se tatimpaguesit e komunës, e cila e merr këtë vendim, “do të përfitojnë nga falja deri në lartësinë e faturës së tatimit në pronë për vitin 2023, por jo më shumë se një qind (100) euro”.
Ndërkaq, ata të cilët e kanë paguar tatimin në pronë për vitin 2023, shuma e falur i llogaritet si paradhënie për vitet pasuese.