Ish-kryenegociatorja e Kosovës për dialogun me Serbinë, Edita Tahiri, në “Debat Plus” në RTV Dukagjini, ka thënë se është obligim ndërkombëtar pranimi i draft-statutit të Asociacionit.
“Ne kemi obligime ndërkombëtare në raport me marrëveshjet që i kemi arritë në dialog. Të gjithë, së pari Qeveria e Kosovës, pastaj Qeveria aktuale, edhe ne që s’jemi më, të gjithë e kanë obligim”, ka thënë Tahiri.
Sipas saj, ky është një obligim dhe se nuk duhet të përmendet sanksioni si një “shkop për presion”.
“Kemi obligim me i zbatu, as që duhet me e përmendë sanksionin si një shkop për presion”, ka thënë Tahiri.
Ish-kryenegociatorja e Kosovës për dialogun me Serbinë është shprehur se Asociacioni duhet të bëhet në pajtim me Kushtetutën e Kosovës dhe të mos lejohet niveli i tretë i qeverisjes
“E kemi obligim të bëhen në pajtim me Kushtetutën e Kosovës, të mos lejohet niveli i tretë i qeverisjes që Kurti me vetëmenaxhim, kombinim me Asociacionin e bëri Republikën Srpska të Kurti, që është niveli i tretë i qeverisjes. Pra, të gjithë e kemi obligim, por në pajtim me Kushtetutën e Kosovës”, ka thënë tutje Tahiri.