Sipas një raporti nga Institutit GAP, nga vlera e investimeve kapitale të reja të nivelit qendror të destinuara për projekte specifike në komuna prej 21.8 milionë euro, Qeveria e Kosovës ka ndarë më shumë mjete për komunat e udhëhequra nga Lëvizja Vetëvendosje.
Kështu rreth 13 milionë euro janë orientuar nga Qeveria në katër komunat e udhëhequra nga VV-ja (Gjilan, Kamenicë, Podujevë dhe Shtime) – sipas GAP, këto komuna përbëjnë 14.5 për qind të sipërfaqes në Kosovë dhe 11.6 për qind të popullsisë.
E këto miliona janë “arsyetuar” nga deputeti i VV-së, Enver Haliti, në “Debat Plus”.
Sipas tij, nuk janë 13 milionë euro për komunat e VV-së, por, rreth 6 milionë, pasi investimet e reja kapitale janë 13 milionë.
“Rrjedhimisht nga ai 13 milionë që janë projektet të reja… 13 milionë euro, afër 50 për qind konsistojnë në katër komunat që udhëhiqen nga VV-ja… Në mesin e atyre katër komuna, duhet pasur parasysh që kemi Komunën e Gjilanit që është njëra ndër komunat më të mëdha të Kosovës, kemi Komunën e Podujevës, përfshihet Komuna e Kamenicës dhe ajo e Shtimes.
Vlen të theksohet sa i përket Komunës së Shtimes është se një pjesë e këtij buxheti është ndarë për ndërtimin ose rindërtimin e instituti që ndodhet në Shtime, ku ai Instituti ofron shërbime për të gjitha komunat e Kosovës”, ka thënë Haliti.
