Avokati Yll Zekaj, në një lidhje direkte në emisionin “FIVE” në RTV Dukagjini, ka thënë se vërejtjet në Komisionin e Venecias lidhur me reformën e Ministrisë së Drejtësisë (MD) po vazhdojnë.
“Po vazhdojnë vërejtjet në Komisionin e Venecias lidhur me reformën që Ministria e Drejtësisë (MD) ka filluar për reformimin e sistemit prokurorial dhe të cilën nuk po mund t’i realizojë për shkak të paqartësive që është duke i draftuar në ligjin për Këshillin Prokurorial”, ka thënë Zekaj.
“Ministria e Drejtësisë nuk po arrin të realizojë qëllimin për të cilin ka filluar këtë reformë në sistemin prokurorial”, ka thënë avokati.
Avokati Yll Zekaj ka thënë tutje se Komisioni i Venecias ka dhënë zgjedhjen e tij, njëjtë edhe shoqëria civile, ku sipas tij, ky komision në opinionin e tij të fundit ka theksuar se duhet të krijohen procedura sidomos për zgjedhjen e anëtarëve joprokuror në sistemin prokurorial.
Sepse sipas tij, këta të fundit nuk mund të zgjidhen nga ata që janë të afërt me politikën.
Ministrja e Drejtësisë, Albulena Haxhiu, dje në një konferencë për media ka njoftuar se Komisioni i Venecias është pajtuar për ndryshimet ligjore, që ka prezantuar Qeveria për reformimin e Këshillit Prokurorial të Kosovës (KPK).
Haxhiu ka bërë të ditur se Komisioni i Venecias nuk e ka përkrahur zgjerimin e përkohshëm të numrit të anëtarëve të KPK-së, duke e vlerësuar rekomandimin e tyre për një Këshill me 7 anëtarë si një reformë të rëndësishme.
Lexo dhe: Haxhiu: Komisioni i Venecias e përkrah propozimin për shtatë anëtarë në KPK
“Komisioni i Venecias nuk e rekomandon zgjerimin e numrit të anëtarëve të Këshillit Prokurorial të Kosovës, por të mbetet në 7, siç kemi theksuar ne dhe kjo konsiderohet reforma që e konsiderojmë të rëndësishme. Këshilli duhet të funksionojë me standardet ndërkombëtare dhe të jetë institucion i pavarur e të ketë debat demokratik në kuadër të anëtarëve prokurorë dhe joprokurorë”, ka thënë ministrja e Drejtësisë.
Ministrja ka prezantuar ndryshimet e propozuara në Ligjin e KPK-së, duke përfshirë një përbërje permanente me 7 anëtarë, 3 prokurorë, 3 anëtarë joprokurorë dhe kryeprokurorin e shtetit.