Një veturë e cila drejtohej nga një serb ndërsa në ulësen e pasagjerit gjendej edhe një serb tjetër janë vërejtur nga policia duke hyrë përmes fshatit Izvor në Zubin Potok nga Serbia në Kosovë.
Policia ka njoftuar se gjatë së premtes pasdite deri sa një njësi Kufitare së bashku me KFOR-in ishin duke patrulluar, kishin vërejtur veturën duke hyrë në Kosovë jashtë pikës së kalimit kufitar, të cilën pastaj e kanë ndaluar.
“Njësia patrulluese e Policisë Kufitare së bashku me KROR-in, gjatë patrullimit kanë vërejtur një veturë duke hyrë nga Serbia në territorin e Republikës së Kosovës jashtë Pikës së Kalimit Kufitar. Vetura është ndaluar, e njëjta drejtohej nga i dyshuari mashkull serb dhe në të ishte edhe një pasagjer mashkull serb”, thuhet në raportin 24-orësh të policisë.
Në lidhje me këtë rast është njoftuar edhe Prokuroria Themelore në Mitrovicë dhe prokurori kujdestar.
Pasi i kishte marrë informacionet nga ekipet policore, prokurori kujdestar ka sugjeruar që rasti të iniciohet si “Kalim ilegal i kufirit”.
“Për rastin është njoftuar prokurori kujdestar dhe i njëjti ka sugjeruar qe rasti të iniciohet në procedurë të rregullt”, thuhet tutje në raport.