Ministrja e Drejtësisë, Albulena Haxhiu, ka emëruar 16 noterë të rinj, për të plotësuar mungesat e krijuara pas refuzimit ose mosdhënies së betimit nga 16 noterë të emëruar më parë.
Siç thuhet në njoftim, ky hap vjen në përputhje me Konkursin Publik për zgjedhjen e 100 noterëve në tërë territorin e Kosovës, ku deri tani janë emëruar gjithsej 84 noterë që tashmë kanë dhënë betimin në përputhje me Ligjin për Noterinë.
“Në përputhje me Konkursin Publik për zgjedhjen e 100 noterë në tërë territorin e Republikës së Kosovës, Ministrja Haxhiu ka emëruar 84 noterë të cilët tashmë e kanë dhënë betimin në përputhje me Ligjin për Noterinë.
Ndërsa për shkak të refuzimit ose mosdhënies së betimit të 16 noterëve të emëruar, Ministrja Haxhiu në vend të tyre ka emëruar 16 noterë të rinj. Vendimet për emërimin e noterëve do të publikohen në webfaqen zyrtare të Ministrisë”, thuhet në njoftim.