Instituti Kombëtar i Shëndetësisë Publike të Kosovës (IKSHPK) ka njoftuar se ka përfunduar monitorimi intensiv i cilësisë së ujit në zonën e shërbimit të KRU “Prishtina” dhe KRU “Mitrovica” pas sulmit në kanalin Ibër-Lepenc më 29 nëntor, në Zubin Potok.
Siç thuhet në një njoftim, pas përpjekjeve për sanimin e gjendjes dhe aktivizimit të by-pass, furnizimi me ujë është stabilizuar dhe që nga data 7 dhjetor nuk ka pasur më restriksione.
Rezultatet e analizave laboratorike për ujin e pijes kanë treguar se uji është brenda standardeve të përcaktuara për konsum nga njeriu.
Kështu, nga data 9 dhjetor, IKShPK-ja njofton se uji mund të përdoret sërish për pije.
“Që nga dita e parë e ngjarjes së fundit në kanalin Ibër-Lepenc, datë 29.12.2024, Instituti Kombëtar i Shëndetësisë Publike të Kosovës (IKSHPK) dhe Qendra Rajonale e Shëndetësisë Publike në Mitrovicë (QRSHP) ka forcuar monitorimin e ujit për pije në zonën e shërbimit të KRU “Prishtina” dhe KRU”Mitrovica”, në Impiantet e trajtimit në Shipol, Balincë, Drenas dhe Shkabaj.
Nga data 29 nëntor deri me 06 dhjetor janë aplikuar restrikcionet në rrjetet shpërndarëse të këtyre dy kompanive si pasojë e veprimeve të ndërmarra për sanimin e gjendjes në kanal.
Bazuar në të dhënat nga KRU “Mitrovica” dhe KRU ”Prishtina” me aktivizimin e By-pass, furnizimi me ujë nga kanali Ibër-Lepenc është stabilizuar në të gjitha Impiantet e lartcekura për trajtimin e ujit, prandaj që nga data 07.12.24 nuk ka pasur restrikcione që nënkupton furnizim me ujë për konsumatorët për nevoja teknike (higjieniko-sanitare).
IKSHPK gjatë këtyre ditëve nga të gjitha impiantet e lartëcekura ka marrë gjithsej 100 mostra të ujit për analiza fiziko-kimike, 100 për analiza bakteriologjike si dhe 13 mostra për analiza në metale të rënda (në ujin e pa trajtuar dhe ujin nga rrjeti shpërndarës).
Rezultatet laboratorike nga dy laboratoret , IKSHPK dhe QRSHP-Mitrovicë, për katër ditët e fundit (e premte, e shtunë, e diele dhe e hënë, 06-09 dhjetor-2024) rezultojnë brenda standardeve të parapara për ujin e pijes për të gjithë parametrat e kërkuar sipas UA 10/2021 ”Cilësia e Ujit të destinuar për konsum nga njeriu”.
Prandaj bazuar në këto rezultate:
Uji që nga sot (09.12.2024) mund të përdoret për pije”, thuhet në njoftim.