Ministria e Punëve të Brendshme e Maqedonisë së Veriut ka njoftuar se po merren masa për gjetjen e një personi tjetër, i cili sipas të afërmve drejtonte veturën “Audi” e cila në orët e pasdites dje ka rënë në ujërat e lumit Vardari pasi ka dalë nga rruga lokale për në fshatin Rashcë.
Aksidenti i komunikacionit është raportuar dje në ora 16:00 në SPB Shkup. Nga MPB theksojnë se në vendngjarje janë dërguar menjëherë zyrtarë policorë dhe shërbimi emergjent mjekësor si dhe prokurori publik.
“Në orën 18:00 nga spitalin “Shën Naum i Ohrit” na njoftuan se nga kalimtarë i kanë sjellë një fëmijë katër vjeçar, i cili më pas është transferuar në Qendrën Klinike. Në orën 21:05, zyrtarët policorë të njësitit “Tigrat” kanë nxjerrë automjetin tip “Audi” nga ujërat e lumit Vardar, në të cilin janë gjetur tre persona të vdekur”, njoftojnë nga MPB.
Siç informuan nga Qendra për Menaxhimin e Krizave, trupat e tre femrave janë nxjerrë nga automjeti i cili është nxjerrë nga Lumi Vardar.