Lista Serbe ka dënuar sulmin e së enjtes së 23 qershorit, në objektin ‘Elektrokosmet” në veri të Mitrovicës.
Këtë e ka bërë përmes një postimi në Facebook, duke shtuar se gjatë këtij sulmi janë shkaktuar dëme materiale.
“Duam të theksojmë se ky sulm dhe rritja e tensioneve janë kundër interesave të popullit tonë në veri të Kosovës”, ka shkruar Lista Serbe.
Sipas njoftimit, Lista Serbe u bën thirrje organeve kompetente që të kryejnë me kujdes të gjitha veprimet e nevojshme hetimore dhe të garantojnë sigurinë për qytetarët.
Ndryshe, në mbrëmjen e së enjtes së 23 qershorit, është hedhur një mjet shpërthyes në një trafo në objektin e distribucionit të energjisë në veri të Mitrovicës.
Lajmin për PortaliD e ka konfirmuar drejtori rajonal i Policisë së Kosovës për Mitrovicë, Besim Hoti.
“Në orën 22:40 mbrëmë, trafoja besohet se është sulmuar. Besohet se është përdorur mjet shpërthyes. Nga ky shpërthim nuk ka mbetur i lënduar askush”, tha Hoti.
Nga ky sulm, Hoti shtoi se ka vetëm dëme materiale.
Si pasojë e këtij shpërthimi, një trafo është dëmtuar krejtësisht dhe disa automjete të cilat kanë qenë të parkuara afër këtij objekti, ndërkaq rasti po vazhdon të hetohet.
Ministri i Punëve të Brendshme, Xhelal Sveçla, ka konfirmuar se objekti i kompanisë “Elektrokosmet” është sulmuar me mjet shpërthyes në veri të Mitrovicës.
Ai ka akuzuar strukturat paralele serbe për këtë veprim, siç ka thënë, kanë bërë presion ndaj kompanisë.
Siç njofton EO, Sveçla tha se nga sulmi nuk ka ndonjë person të lënduar, pos dëmeve materiale.“Rasti po hetohet nga organet e rendit”, u shpreh Sveçla.