Prokuroria Themelore në Pejë dhe Policia e Kosovës kanë konfirmuar për se janë arrestuar dy të dyshuarit për plagosjen që ndodhi mbrëmë në Komunën e Klinës.
Sipas informatave katër viktimat janë vëllezër, por që arsyet që kanë çuar deri të konflikti ende nuk janë të ditura për Prokurorin e Policinë.
Zëdhënësi i Prokurorisë Themelore në Pejë, Shkodran Nikçi e ka konfirmuar se pas një operacioni intensiv janë lokalizuar dhe arrestuar dy të dyshuarit gjatë orëve të mesnatës. Nikçi njoftoi se Prokurori i Shtetit është duke përpiluar kërkesën për caktimin e masës së paraburgimit ndaj dy të dyshuarve.
“Fillimisht janë arrestuar dy persona pas mesnatës, të njëjtit janë ndaluar për 48 –orë. Dhe Prokurori I Shtetit është duke përpiluar kërkesën për paraburgim. Ka dhënë autorizime shtesë për Policinë e Kosovës për sigurimin e provave të tjera përpos ato të siguruara në vendin e ngjarjes. Seanca dëgjimore besoj që do të mbahet nesër në Gjykatën Themelore të Pejës. Dhe gjatë seancës do të paraqitet kërkesa për vazhdimin e masës së paraburgimit.
Si prokurori, jemi në fazën e grumbullimit të të gjitha informatave për të kuptuar rrethanat tjera se si ka ndodhur kjo ngjarje, jemi të rezervuar”, deklaroi Nikçi.