Sot, e martë më 15 prill, në orën 10:00, pritet të konstituohet legjislatura e nëntë e Kuvendit të Kosovës, pas zgjedhjeve parlamentare të mbajtura më 9 shkurt.
Fituesja e këtyre zgjedhjeve, Lëvizja Vetëvendosje, do të përfaqësohet me 48 deputetë në Kuvend.
Megjithëse LVV nuk dihet nëse do të sigurojë votat për zgjedhjen e kryetarit të Kuvendit, por gjithashtu mbetet e paqartë nëse ka mbështetjen e nevojshme për të votuar Qeverinë e re.
Partia Demokratike e Kosovës ka paralajmëruar se nuk do të marrë pjesë në votimin për kryeparlamentarin, në mungesë të një “zgjidhjeje të qëndrueshme për Kosovën”.
Ndërkohë, Aleanca për Ardhmërinë e Kosovës është shprehur në parim pro konstituimit të legjislaturës së re.
Ndihmë për LVV-në pritet të vijë nga shtatë deputetë të komuniteteve pakicë joserbe, të cilët, sipas ministrit në detyrë Elbert Krasniqi, do të mbështesin edhe krijimin e Qeverisë së re.
Kujtojmë se në Kuvendin e Kosovës do të ulen 120 deputetët e zgjedhur me votën e lirë të qytetarëve.
Rendi i ditës:
1. Formimi i Komisionit të përkohshëm për verifikimin e kuorumit dhe të mandateve të deputetëve,
2. Betimi i deputetëve,
3. Zgjedhja e Kryetarit të Kuvendit,
4. Zgjedhja e nënkryetarëve të Kuvendit.