Kryetari i Kuvendit të Kosovës, Glauk Konjufca, ka reaguar pas lajmit për ndarjen nga jeta të gazetarit të njohur, Sylejman Shaqiri. Përmes një postimi publik në “Facebook”, Konjufca ka vlerësuar lart figurën dhe kontributin e Shaqirit në fushën e medias dhe informimit publik.
“Me trishtim mora lajmin se ka ndërruar jetë gazetari Sylejman Shaqiri. Ai do të mbetet një emër i dalluar i gazetarisë, me një kontribut të gjerë e të shumanshëm në radio dhe televizion që prej viteve ‘80,” – ka shkruar Konjufca.
Sipas tij, puna e Shaqirit në Radio Televizionin e Kosovës (RTK), ku kishte shërbyer edhe si drejtor i përgjithshëm, ka lënë gjurmë të pashlyeshme në historinë e medias kosovare.
“Ngushëllimet më të sinqerta familjes, kolegëve dhe miqve të Sylejman Shaqirit, për humbjen e më të dashurit të tyre. U prehtë në paqe dhe qoftë i paharruar,” – ka përfunduar Konjufca.