Deputeti i Partisë Demokratike të Kosovës, Rashit Qalaj, ka thënë sot para Kuvendit se qëndrimi i partisë së tij për emrin e Albulena Haxhiut si kryetare e Kuvendit mbetet i pandryshuar.
“Qëndrimi i PDK-së është i njëjtë, nuk ka ndryshuar, nuk ndryshon sot, as pas 48 orëve, nuk do të ndryshojë as pas një jave apo një muaji. Sa i përket zonjës Haxhiu, te PDK-ja nuk kalon”, deklaroi Qalaj.
Ai theksoi se nuk është në dorën e PDK-së të kërkojë takime, pasi këtë e përcakton koalicioni që ka më shumë vota në legjislaturë, por sipas tij, duhet të gjendet një gjuhë e përbashkët për të ecur përpara.
Këto deklarime vijnë në ditën kur Kuvendi i Kosovës pritet të mblidhet sërish për tentativën e tetë për të konstituuar institucionin, ndërsa kjo është hera e pestë që emri i Albulena Haxhiut del për votim për kryeparlamentare. Asaj i mungojnë edhe katër vota për t’u zgjedhur, vota që vazhdojnë të mungojnë për shkak të qëndrimit të opozitës.