Ambasadori i Mbretërisë së Bashkuar, Jonathan Hargreaves, ka zhvilluar një takim me kryeministrin në detyrë Albin Kurti, ku diskutuan për krizën institucionale në Kuvendin e Kosovës dhe për zhvillimet e fundit në pjesën veriore të vendit.
Përmes një deklarate publike, ambasadori Hargreaves theksoi se ekziston një nevojë urgjente për të zgjidhur ngërçin parlamentar që ka bllokuar konstituimin e Kuvendit.
Ai nënvizoi rëndësinë e veprimeve të përmbajtura dhe të koordinuara për të shmangur përshkallëzimin e situatës në veri.
“Dje u takova me Kryeministrin në detyrë Kurti. Diskutuam nevojën urgjente për të zgjidhur ngërçin parlamentar, si dhe ngjarjet e fundit në veri të Kosovës. Ramë dakord se është në interesin e të gjithëve të shmangen veprimet përshkallëzuese dhe të ruhet një mjedis i sigurt në rajon, dhe se të drejtat dhe mbrojtjet për të gjithë qytetarët e Kosovës duhet të respektohen plotësisht. Theksova rëndësinë e diskutimit dhe zgjidhjes së çështjeve të tilla përmes Dialogut të lehtësuar nga BE-ja”, ka shkruar ambasadori britanik.