Prokuroria Themelore në Prizren ka kërkuar masën e paraburgimit prej 30 ditësh për të pandehurin E.B., i dyshuar për vrasjen e rëndë që ndodhi të dielën mbrëma, më 10 gusht 2025, në lagjen “Tusuz” të Prizrenit.
Sipas Prokurorisë, ngjarja ka nisur pas një mosmarrëveshjeje që shpërtheu kur i pandehuri dhe viktima, H.Sh., i nxitën qentë e tyre në një përleshje.
Pas një fjalosjeje të shkurtër, E.B. dyshohet se ka vepruar në mënyrë të befasishme dhe dinake, duke shfrytëzuar momentin dhe nxjerrë një thikë-patente, me të cilën e ka goditur viktimën.
H.Sh. u dërgua fillimisht në Qendrën Klinike Universitare të Kosovës (QKUK) në Prishtinë, por humbi jetën si pasojë e plagëve të marra.
Prokuroria ka bërë të ditur se E.B. po hetohet për veprën penale “Vrasje e rëndë”, si dhe për “Mbajtje në pronësi, kontroll ose posedim të paautorizuar të armëve”.