Klinika e Onkologjisë dhe shërbimi i Emergjencës në Qendrën Klinike Universitare të Kosovës kanë pranuar një donacion të ri pajisjesh mjekësore nga organizata joqeveritare “Cicat”, me synim përmirësimin e kushteve të trajtimit dhe rritjen e kapaciteteve për menaxhimin e rasteve emergjente.
Pajisjet e dhuruara përfshijnë dy aparatura për ngrohjen e gjakut dhe disa karroca për transportimin e barnave.
Themeluesja e organizatës, Ermira Murati, e cilësoi këtë si një ditë të veçantë, duke e lidhur donacionin me rezultatet e një bashkëpunimi të suksesshëm gjatë rezidencës artistike të mbajtur vitin e kaluar në kuadër të festivalit “Shliroj cicat”.
Ajo falënderoi komunitetin shqiptar në Zvicër për mbështetjen dhe zemërgjerësinë, si dhe anëtarët e bordit të organizatës për angazhimin e tyre.
Dorëzimi i pajisjeve u bë në ambientet e QKUK-së, ku drejtuesit e Klinikës vlerësuan kontributin e këtij investimi në përmirësimin e cilësisë së trajtimit.
Drejtori i Klinikës së Onkologjisë, Ilir Kurteshi, theksoi se pajisjet e reja do të lehtësojnë punën e stafit mjekësor dhe do të ofrojnë shërbime më efikase për pacientët me diagnoza të rënda, duke reduktuar gjithashtu kostot për familjarët.
Ky donacion shihet si pjesë e një procesi më të gjerë modernizimi të infrastrukturës shëndetësore, me fokus në përmirësimin e shërbimeve në sektorët ku nevoja është më e madhe./KP