Agjencia e Ushqimit dhe Veterinarisë (AUV), zyra regjionale në Ferizaj, ka njoftuar se gjatë një inspektimi të përbashkët me Policinë e Kosovës në tregun e gjelbër, është ndaluar shitja e produkteve të bylmetit dhe e shpezëve në hapësira publike.
Produkte të bylmetit jashtë kushteve ligjore
Sipas AUV-së, është konstatuar se djathi, gjiza, qumështi i freskët dhe nënproduktet e tjera të qumështit po shiteshin në hapësira të pambrojtura dhe në temperatura të ambientit.
Inspektorët theksojnë se produktet e këtij lloji, sipas ligjit, duhet të ruhen në kushte frigoriferike 0–6°C dhe të jenë të mbrojtura nga ndotja dhe kontaminimi. Shitja e tyre jashtë këtyre standardeve përbën shkelje serioze të rregullave higjieno-sanitare dhe rrezikon shëndetin publik.
Në bazë të Ligjit Nr. 08/L-120 për Ushqim, është urdhëruar largimi i produkteve të pasigurta dhe ndalimi i menjëhershëm i shitjes së tyre. Për rastet e përsëritura, parashihet konfiskim, asgjësim i produkteve dhe sanksionim ligjor.
Shitja e shpezëve në rrugë – e ndaluar
Gjatë kontrollit thuhet se është evidentuar edhe shitja e kundërligjshme e shpezëve në hapësira publike, ku disa qytetarë kishin bllokuar trotuaret duke krijuar rrezik për shëndetin publik për shkak të mungesës së kushteve higjieno-sanitare.
Sipas ligjeve për Ushqim, për Mbrojtjen e Konsumatorit dhe për Rregullat e Trafikut Rrugor, shitja e kafshëve apo produkteve ushqimore në trotuar është e ndaluar. Policia dhe inspektorët larguan shpezët nga hapësira publike, duke paralajmëruar se në rast përsëritjeje do të konfiskohen dhe asgjësohen.
Apel për qytetarët
AUV u ka bërë thirrje qytetarëve që të blejnë vetëm produkte të bylmetit që ruhen në kushte frigoriferike dhe që kanë etiketë të qartë për origjinën dhe afatin e përdorimit.
Agjencia ritheksoi se inspektimet do të vazhdojnë rregullisht, me qëllim sigurimin e ushqimit të shëndetshëm për konsumatorët dhe mbrojtjen e rendit publik.