Para fillimit të seancës së Kuvendit, lideri i AAK-së, Ramush Haradinaj, deklaroi se aktgjykimi i Gjykatës Kushtetuese ka sqaruar disa çështje lidhur me procesin e konstituimit.
“Do të kthehemi në parlament pas vendimit të Gjykatës. Tashmë është bërë e qartë se votimi duhet të jetë i hapur, se një kandidat që nuk merr votën nuk mund të kandidojë më shumë se tri herë, si dhe është sqaruar afati prej 30 ditësh”, tha Haradinaj.
Ai nënvizoi se partia e tij nuk do ta mbështesë kandidaturën e Albulena Haxhiut, por është e gatshme të votojë një kandidat tjetër nga LVV, të cilin e sheh si unifikues. “Nëse sot kandidati do të ishte Glauk Konjufca, Saranda Bogujevci ose Shqipe Hetemi, ne do të votojmë”, u shpreh Haradinaj.
I pyetur se çfarë do të ndodhte nëse Kuvendi nuk konstituohet as pas afatit 30-ditor, ai tha se kjo do ta vërtetonte qëllimin e kryeministrit në detyrë, Albin Kurti. “Për fat të keq besoj që qëllimi i tij nuk ka ndryshuar: të vazhdojë ta mbajë peng Kosovën, ta udhëheqë në mënyrë joligjore dhe të mos lejojë funksionimin normal të institucioneve”, theksoi Haradinaj.