Presidentja e Kosovës, Vjosa Osmani, ka përshëndetur hapjen e rrugës për zhbllokimin e procesit të konstituimit të Kuvendit, duke e cilësuar këtë si një hap të rëndësishëm drejt rikthimit të funksionalitetit institucional në vend.
Në një postim në Facebook të Presidencës thuhet se Osmani ka shprehur pritjen që ky proces të përmbyllet sa më shpejt, në përputhje me Kushtetutën dhe normat demokratike.
Ajo ka uruar kryetarin e ri të Kuvendit, Dimal Basha, si dhe nënkryetarët Albulena Haxhiu, Vlora Çitaku, Kujtim Shala dhe Emilija Rexhepi, duke theksuar se pret nga udhëheqja e re parlamentare që të punojë në interes të qytetarëve dhe forcimit të institucioneve demokratike.
Presidentja gjithashtu ka bërë thirrje që Kuvendi të vijojë me hapat kushtetues dhe të procedojë sa më parë me votimin e Qeverisë së re të dalë nga zgjedhjet e 9 shkurtit.
“Respektimi i vullnetit të qytetarëve dhe përmbushja e detyrimeve kushtetuese janë thelbësore për stabilitetin dhe funksionimin demokratik të vendit”, thuhet në reagimin e Presidencës.