Është data 22 mars 2021.
Kryesuesi Avni Dehari i hapë rrugë votimit të nënkryetarëve. Lista Serbe e propozon Slavko Simiqin, ndërkaq komunitetet tjera, Bekim Arifin.
“Vazhdojmë me zgjedhjen e dy nënkryetarëve të Kuvendit, një nga radhët e deputetëve të komunitetit serb dhe një nga radhët e deputetëve të komuniteteve të tjera që nuk janë shumicë. Zgjedhja e tyre bëhet me një votim, mbështetur në nenin 67, paragrafi 4 i Kushtetutës së Republikës së Kosovës deputetët që mbajnë vende të garantuara për komunitetin serb propozojnë një deputet për nënkryetar të Kuvendit dhe deputetët që mbajnë vende të garantuara për komunitet e tjera që nuk janë shumicë propozojnë një deputet për nënkryetar të Kuvendit…”, kishte thënë Dehari.
Ashtu sikurse në të kaluarën, nënkryetarët nga komunitetet votohen në pako e jo ndaras.
Slavko Simiq dhe Bekim Arifi, me 91 vota për, 6 kundër, dhe 10 abstenime e kalojnë testin.
Në mesin e votave pro janë të gjithë deputetët e Lëvizjes Vetëvendosje, përfshirë disa të PDK-së, dhe deputetë të komuniteteve.
Fiks 4 vite më vonë, Lëvizja Vetëvendosje e ka ndryshuar edhe qëndrimin për ta votuar Simiqin, por edhe formën e votimit.
Në seancën e djeshme, kryetari Dimal Basha e ndau votimin nuk shkoi në pako, një herë u votuan komunitetet tjera, pastaj erdhën në radhë serbët, por nuk kishte vota për të propozuarin Slavko Simiq, e as të tjerë pas shortit.
Lideri i Vetëvendosjes dhe kryeministër në detyrë, Albin Kurti sot nuk ka dashur të përgjigjet për këtë.
Të gjitha këto pyetje e informacionet e lartcekura, i janë dërguar edhe zëdhënësit të Lëvizjes Vetëvendosje por as Arlind Manxhuka, nuk ka dhënë përgjigje.
Ndërkohë, në anën tjetër, Nenad Rashiq, e ka konfirmuar se edhe në seancën e nesërme do ta propozojë vetën për nënkryetar të Kuvendit.
Instituti i Kosovës për Drejtësi vlerëson se në votimin e nënkryetarëve nga komunitet, është shkelur Kushtetuta, Rregullorja e punës së Kuvendit, aktgjykimet e Gjykatës Kushtetuese dhe praktikat e kaluara parlamentare.
“Ata fillimisht është dashur që të votohen në pako, e jo të votohen veçmas. Po ashtu tek propozimi sipas Institutit të Kosovës për Drejtësi, vlen të ceket fakti që deputetët për nënkryetarë nga komunitetet duhet të propozohen nga shumica e komunitetit e jo të vetë propozohen, sepse vetëpropzimi nuk është i paraparë askund në aktgjykimet e Gjykatës Kushtetuese po ashtu as në Kushtetutë”, ka thënë Melos Kolshi.
Kolshi thotë se i gjithë procesi i votimit duhet të përsëritet, s’duhet të ketë short, nënkryetarët duhet të propozohen me shkrim dhe të votohen në pako, dhe të mos ketë tentime që komunitete jo-serbe të kenë nënkryetarë që e ushtrojnë postin me rotacion.
Seanca për konstituim të Kuvendit vazhdon nesër në orën 11 dhe e njëjta nuk konsiderohet e përfunduar pa zgjedhjen edhe të nënkryetarëve, afat për të cilin deputetët kanë deri më 18 shtator.