Një bombardim i madh rus gjatë natës në Kiev ka shkaktuar vdekjen e 12 personave, përfshirë tre fëmijë, si dhe plagosjen e dhjetëra të tjerëve, kanë njoftuar autoritetet ukrainase.
Sipas raportimeve, mbi 20 lokacione në kryeqytet u goditën nga sulmi, mes tyre ndërtesa banimi, objekte civile dhe një çerdhe që u përfshi nga flakët. Në mesin e viktimave ishte edhe një vajzë 14-vjeçare, ndërsa disa fëmijë të tjerë u plagosën. Ministri i Brendshëm, Ihor Klymenko, konfirmoi vdekjen e dy fëmijëve, duke e cilësuar sulmin si një nga më të rëndët e këtij muaji.
Forcat ukrainase bënë të ditur se Rusia përdori gati 600 dronë dhe mbi 30 raketa balistike e lundruese. Sulmi pasoi një tjetër valë goditjesh që kohët e fundit kanë lënë mbi 100 mijë shtëpi pa energji elektrike, si pasojë e dëmtimit të infrastrukturës energjetike.
Presidenti Volodymyr Zelensky reagoi duke akuzuar Moskën se ka zgjedhur “balistikën në vend të tryezës së negociatave”, duke kërkuar vendosjen e “sanksioneve të reja e të ashpra” ndaj Rusisë dhe një përgjigje të fortë ndërkombëtare.
Ndërkohë, selia e delegacionit të Bashkimit Evropian në Kiev gjithashtu është raportuar se ka pësuar dëmtime, siç bëri të ditur Presidenti i Këshillit Evropian, António Costa.
Ky sulm i përgjakshëm përbën një tjetër dëshmi të rrezikut të përditshëm që po përjetojnë civilët ukrainas në një luftë që vazhdon të marrë jetë të pafajshme çdo ditë.