Një tragjedi e rëndë ka goditur Minneapolisin mëngjesin e së mërkurës, kur një sulmues 23-vjeçar, i identifikuar si Robin Westman, hapi zjarr drejt një shkolle pranë Kishës së Ungjillëzimit, teksa fëmijët po merrnin pjesë në meshën e përditshme.
Nga të shtënat humbën jetën dy fëmijë, të moshës 8 dhe 10 vjeç, ndërsa 17 persona të tjerë u plagosën. Pas sulmit, Westman kreu vetëvrasje me armën e tij në vendngjarje.
Shefi i policisë së Minneapolis, Brian O’Hara, e cilësoi ngjarjen si “një akt të qëllimshëm dhune kundër fëmijëve të pafajshëm dhe besimtarëve”, duke e quajtur mizorinë e sulmit “absolutisht të pakuptueshme”. Ai tha se komuniteti është tronditur thellë nga humbja e jetëve në një vend që duhej të ishte simbol i paqes dhe sigurisë.
FBI ka marrë në dorë hetimet, duke e klasifikuar rastin si akt terrorizmi të brendshëm dhe krim urrejtjeje me motive anti-katolike. Autoritetet federale dhe lokale po punojnë së bashku për të zbardhur motivet e sakta të autorit, ndonëse hetuesit theksojnë se shënjestra ishte komuniteti katolik.
Në reagim ndaj tragjedisë, Papa Leo XIV, papa i parë amerikan, shprehu dhimbje të thellë dhe bëri homazhe për viktimat, duke e quajtur sulmin një akt të rëndë dhune kundër besimtarëve.
Kjo ngjarje ka tronditur opinionin publik në SHBA, duke ngritur shqetësime të reja për sigurinë e komuniteteve fetare dhe rrezikun në rritje të krimeve të urrejtjes.