Kryeministri në detyrë i Kosovës, Albin Kurti, ka reaguar pas debatit publik rreth artikullit të botuar më shumë se një dekadë më parë, ku bashkautor është kryetari i sapozgjedhur i Kuvendit, Dimal Basha.
Kurti ka thënë se Basha tashmë ka dhënë sqarimin e tij, duke theksuar se kapitulli i shkruar prej tij nuk ka pasur lidhje me Ushtrinë Çlirimtare të Kosovës.
“Dimal Basha e ka dhënë sqarimin për atë publikim që është bërë para më shumë se një dekade. Ai ka thënë se kapitulli që e ka shkruar nuk ka të bëjë me UÇK-në. Edhe në fjalimin e tij pas zgjedhjes si kryetar Kuvendi, ai shprehu vlerësimet më të larta për këtë vlerë të kombit shqiptar”, ka thënë Kurti.
Kurti e cilësoi si keqinterpretim dhe deformim zhurmën e krijuar rreth këtij shkrimi.
“Unë besoj që problemet që i kemi sot në Kosovë nuk i kemi nga një deformim e keqinterpretim i një artikulli me bashkautorësi ku ky nuk është autor i atij kapitulli të para më shumë se një dekade. Problemet i kemi kur është nënshkruar ‘Zajednica’ në 2013, kur janë amnistuar kriminelët serbë në veri po ashtu në 2013, kur është votuar Gjykata Speciale në 2015, kur është themeluar Lista Serbe bashkë me Beogradin në 2013.
Problemet i kemi kur politikanët e Kosovës kanë bërë qeveri duke u varur nga Lista Serbe apo kur kanë hyrë në pazare për ndarje të Kosovës….”, ka shtuar Kurti.