Kandidati i PDK-së për kryetar të Lipjanit, Shukri Buja, në një intervistë për emisionin FIVE në RTV Dukagjini ka folur për zhvillimet dhe sfidat me të cilat përballen fshatrat e komunës.
Ai theksoi se Janjeva ka potencial të zhvillohet dhe të rikthehet në qytezën që dikur ishte. Sipas tij, në hartimin e programit të tij qeverisës kanë punuar 55 ekspertë nga Lipjani dhe nga vende të tjera, të cilët fillimisht kanë identifikuar problemet nëpër fshatra dhe qytet, për të ndërtuar më pas planin e veprimit.
Duke folur për fshatin Gadime, Buja tha se problemi kryesor atje mbetet infrastruktura e urave.
“Janë dy ura të ngushta, shumë të rrezikshme, të cilat datojnë që nga koha e ish-Jugosllavisë”, u shpreh ai.
Tutje, ai përmendi edhe fshatin Baicë dhe mundësitë për zhvillimin e turizmit përmes ujërave termale, duke theksuar se turizmi është një potencial jo vetëm për Gadimen, por edhe për Baicën.
Buja foli edhe për fshatin Shalë, ku sipas tij nuk funksionon as sistemi i ujësjellësit. “Ka shumë probleme, por për secilin prej tyre ne kemi zgjidhje”, deklaroi ai.
Ai shtoi se edhe Magura përballet me mungesë të ujit të pijshëm, ndërsa në nivel komunal një nga sfidat kryesore vazhdon të mbetet çështja e ujërave të zeza dhe mungesa e kanalizimit.