Eksperti i sigurisë, Burim Ramadani, ka reaguar ashpër ndaj maqedonases Jana Arsovska, autore e një artikulli të vitit 2012 ku përmendet edhe kryetari aktual i Kuvendit të Kosovës, Dimal Basha.
Në një reagim të publikuar në rrjetet sociale, Ramadani ka shprehur shqetësimin e tij për heshtjen e institucioneve të Kosovës ndaj veprimeve të Arsovskës dhe bashkëpunëtorëve të saj.
“Pse nuk po dëgjohet zëri juaj për propagandisten agresive Jana Arsovska?”, ka shkruar ai, duke kërkuar një përgjigje shtetërore të menjëhershme dhe të vendosur.
Sipas tij, propaganda që vjen nga individë të tillë përbën pjesë të një “lufte hibride”, e cila duhet të marrë një goditje serioze nga niveli më i lartë institucional.
“Lufta hibride nga Jana Arsovska dhe të ngjashmit e saj duhet të marrë goditje shtetërore të menjëhershme”, ka theksuar Ramadani, duke shtuar se reagimi nuk duhet të ndikohet nga agjenda politike, partiake apo grupore, por të udhëhiqet vetëm nga interesat e sigurisë kombëtare.
Ai ka kërkuar që Arsovska të shpallet persona non grata dhe bashkëpunëtorët e saj të përjashtohen përgjithmonë nga skena publike shqiptare.
“Me sigurinë kombëtare nuk bëhet lojë, ajo nuk duhet të trajtohet në varësi të konformitetit të pushtetit”, ka nënvizuar ai.
Ramadani ka paralajmëruar gjithashtu për pasojat që mund të sjellë mosreagimi në kohë: “Në siguri kombëtare, përgjegjësia është aq e madhe sa që edhe mosdija është tradhti”, ka përfunduar ai.