“E gëzofshin qytetarët këtë projekt! 💚”!
Kështu e përuroi Kryetari i Podujevës, Shpejtim Bulliqi shtegun e vrapimit në atë që njihet si “Parku i Paqes”, disa kilometra larg qendrës së qytetit.
Por tre muaj pasi e përuroi, shtegu niset të çahet duke u bërë i papërshtatshëm për qarkullim.
Disa orë pasi u bënë publike pamjet, ekipet e mirëmbajtjes dolën në terren.
Ani pse vrimat u mbuluan, shenjat e përmirësimit dukeshin qartë.
Por ky nuk është i vetmi shteg ecjeje që është në këtë gjendje.
Kështu ka mbetur një shteg tjetër e dy trotuare, tek pishat e fshatit Kërpimeh, tash e dy vite.
Në të trija shtigjet, janë vendosur vetëm anësoret. Asgjë më shumë.
Banorët në të cilët ka rastisur televizioni kanë bërë të ditur se autoritetet komunale nuk kanë vazhduar punën që nga viti 2023. Për rrjedhojë, këto shtigje kanë mbetur kështu, të lëna në gjysmë e të papërshtatshme për t’u shfrytëzuar.
Përpos shtigjeve, në gjendje të keqe është edhe për mirëmbajtje të vendit ku parashihet të vendosen ato.
Kritikuese shprehet opozita e cila thotë se shpenzimet e komunës po shkojnë dëm.
“Është një kontratë mbi 400 mijë euro për shtigjet në Kërpimeh dhe Shajkovc. Asnjëra nga shtigjet s’janë ndërtuar, janë me probleme dhe jo funksionale. Si papërgjegjësi është edhe neglizhencë, ngase mbesin në gjendje të tmerrshme”, ka thënë Valon Demolli, asamblist i LDK-së.
Tenderët që datojnë nga 2024 për shtrim të trotuareve, i janë dhënë kompanisë ‘Bini”. Në vlerë prej 200 mijë euro.
Siç po ndodhë në vazhdimësi, Komuna e Podujevës po vazhdon të mos deklarohet publikisht mbi projektet e lëna në gjysmë, arsyet, shkaqet dhe kostot.
As kësaj radhe, Drejtori i Shërbimeve Publike Bahri Selimi nuk ka kthyer përgjigje për Dukagjinin.