Ish-ndihmësi i sekretarit amerikan të Shtetit, James Rubin, ka përmbyllur për sot dëshminë e tij në Gjykatën Speciale në Hagë. Seanca do të vijojë nesër në orën 09:00, siç njoftoi gjyqtari Charles Smith në fund të seancës së sotme.
Diplomati amerikan dëshmoi në mbrojtje të Hashim Thaçit dhe ish-krerëve të tjerë të Ushtrisë Çlirimtare të Kosovës, të cilët që nga nëntori i vitit 2020 ndodhen në paraburgim në Hagë, nën akuza për krime lufte dhe krime kundër njerëzimit, të supozuara gjatë periudhës së luftës në Kosovë.
Në dëshminë e tij, Rubin deklaroi se roli i Thaçit ishte politik dhe se ai nuk kishte kompetenca ekzekutive për marrjen e vendimeve ushtarake brenda UÇK-së. Sipas tij, Thaçi duhej të merrte aprovimin e komandantëve të zonave për çdo vendim të rëndësishëm.
Rubin shtoi se akuzat që e lidhin Thaçin me krime lufte dhe veprime të ngjashme ishin hetuar, por nga informacionet shtetërore amerikane ishte konfirmuar se ato nuk ishin të vërteta dhe buronin nga qarqe serbe.