Presidenti i Francës, Emmanuel Macron, ka shpallur zyrtarisht njohjen e shtetit palestinez, duke e cilësuar këtë vendim si një hap të ndërmarrë “në interes të paqes”. Deklarata e tij është pritur me kritika nga Izraeli dhe Shtetet e Bashkuara.
“Duke respektuar zotimin historik të Francës ndaj Lindjes së Mesme dhe paqes mes izraelitëve dhe palestinezëve, sot njoftoj se Franca njeh shtetin e Palestinës”, u shpreh Macron gjatë fjalës së tij në Asamblenë e Përgjithshme të Kombeve të Bashkuara, ku delegacioni palestinez e mirëpriti këtë hap.
Njoftimi erdhi në fillim të një samiti për palestinezët të organizuar në OKB. Megjithatë, si ky samit ashtu edhe vendimet për njohjen e shtetit palestinez nuk pritet të sjellin ndryshime të menjëhershme në terren, ku Izraeli vijon ofensivën në Rripin e Gazës dhe zgjerimin e vendbanimeve në Bregun Perëndimor të pushtuar.
Në këtë takim, presidenti i Autoritetit Palestinez, Mahmoud Abbas, do të flasë përmes video-lidhjes, pasi ai dhe dhjetëra zyrtarë të tjerë palestinezë nuk morën viza nga SHBA-ja, duke u pamundësuar pjesëmarrjen në konferencë.
Njohja e Francës vjen një ditë pasi Britania, Kanadaja dhe Australia shpallën të njëjtin vendim, duke iu bashkuar një nisme më të gjerë që synon ringjalljen e procesit për zgjidhjen me dy shtete. Pritet që dhjetë shtete gjithsej ta shpallin njohjen në ditët e ardhshme.
Aktualisht, rreth tri të katërtat e 193 vendeve anëtare të OKB-së e njohin Palestinën si shtet, ndërsa shumica e vendeve perëndimore kanë hezituar deri më tani, duke kushtëzuar një vendim të tillë me zhvillimin e negociatave me Izraelin.