Presidentja e Kosovës, Vjosa Osmani, ka njoftuar se gjatë qëndrimit në New York ka zhvilluar takim me ndihmëssekretarin e përgjithshëm të NATO-s, Boris Ruge.
Ajo tha se në këtë takim ka ritheksuar mirënjohjen e popullit të Kosovës për kontributin e vazhdueshëm të NATO-s në vend, si dhe përkushtimin e institucioneve të Kosovës për t’u anëtarësuar në Aleancën Veri-Atlantike.
“Gjatë takimit, ritheksova mirënjohjen e popullit të Kosovës për kontributin e vazhdueshëm të NATO-s në vendin tonë, si dhe përkushtimin e Republikës së Kosovës për anëtarësim në Aleancën Veri-Atlantike”, ka shkruar Osmani në Facebook.
Presidentja po qëndron në New York për të marrë pjesë në punimet e sesionit të 80-të të Asamblesë së Përgjithshme të Kombeve të Bashkuara, që mbahet nga 23 deri më 29 shtator.
Gjatë vizitës, ajo ka zhvilluar takime edhe me komunitetin shqiptar në SHBA, ndërsa ka njoftuar se është takuar edhe me sekretarin e përgjithshëm të Ligës Arabe, Ahmed Aboul Gheit.