Instituti Kombëtar i Shëndetësisë Publike të Kosovës (IKShPK) ka njoftuar sot se cilësia e ujit të pijshëm në zonën e furnizimit PR03, që mbulohet nga Ujësjellësi i Badocit, është përmirësuar dukshëm në aspektin e nivelit të manganit.
Sipas analizave laboratorike të kryera gjatë tri ditëve të fundit në Laboratorin e parametrave bazik dhe në Laboratorin analitik – ICPMS, vlerat më të larta të manganit kanë lëvizur nga 0.012 mg/l deri në 0.037 mg/l. Këto rezultate janë plotësisht brenda standardeve të përcaktuara nga Udhëzimi Administrativ (UA) nr. 10/2021 për cilësinë e ujit të destinuar për konsum nga njeriu.
Në bazë të këtyre matjeve, IKShPK ka bërë të ditur se uji në këtë zonë është i sigurt për konsum.
Instituti theksoi se, në bashkëpunim me institucionet e tjera përgjegjëse, do të vazhdojë monitorimin e rregullt dhe të pandërprerë të cilësisë së ujit, duke garantuar transparencë dhe informim të saktë për qytetarët.