Kosova është renditur sërish në Nivelin 2 të raportit të fundit të Departamentit Amerikan të Shtetit për Trafikimin e Qenieve Njerëzore.
Në këtë kategori përfshihen shtetet që bëjnë përpjekje të konsiderueshme kundër trafikimit, por ende nuk i plotësojnë standardet minimale ndërkombëtare.
“Qeveria e Kosovës nuk i përmbush plotësisht standardet minimale për eliminimin e trafikimit, por po bën përpjekje të konsiderueshme për ta bërë këtë. Qeveria demonstroi përpjekje në përgjithësi në rritje krahasuar me periudhën e mëparshme të raportimit; prandaj, Kosova mbeti në Nivelin 2. Këto përpjekje përfshinin ndjekjen penale të më shumë trafikantëve të dyshuar dhe identifikimin e më shumë viktimave”, thuhet nga DASH.
Raporti vlerëson rritjen e ndjekjes penale ndaj trafikantëve dhe fondet shtesë për viktimat, por kritikon dënimet e ulëta, lirimin e shumicës së të dyshuarve dhe trajtimin e rasteve të fëmijëve lypës si keqtrajtim, jo trafikim.
Më 2024, autoritetet hetuan 17 raste me 49 të dyshuar, por vetëm një trafikant u dënua – me tetë muaj burgim, nën minimumin ligjor prej pesë vjetësh. Po ashtu, u identifikuan 14 viktima, shumica e të cilave morën ndihmë.
DASH rekomandon hetime më të forta, dënime më të rënda dhe fokus tek grupet e ndjeshme. Në të njëjtën kategori janë edhe Shqipëria, Serbia, Mali i Zi, Bosnja dhe Maqedonia e Veriut.