Kandidati për kryetar të Prishtinës, Uran Ismaili, bashkë me ekipin e tij ka shpërndarë sot numrin e shtatë të gazetës javore “Koha për Prishtinën”, e cila këtë javë vjen me titullin “Koha për Uranin”. Në këtë numër trajtohen 5 zgjidhjet emergjente të Ismailit për ta kthyer Prishtinën në një qytet funksional.
Faqja e parë e gazetës përmban zotimin e tij në formë kontrate me qytetarët, të nënshkruar nga vetë ai, ku zotohet se nëse nuk përmbush 90% të premtimeve gjatë mandatit të parë, nuk do të kërkojë votë për një mandat të dytë. Ai ka ftuar qytetarët që ta nënshkruajnë këtë kontratë dhe ta mbajnë përgjegjës për realizimin e zotimeve të tij.
Në faqen e dytë paraqiten 10 vendimet e para që Ismaili do të marrë menjëherë pas zgjedhjeve, ndërsa faqja e tretë përmban 5 zgjidhjet për Prishtinën funksionale:Hapja e sheshit “Xhorxh Bush”, zhbllokimi i trafikut brenda 18 muajsh, lagje të pastra 24/7, rrugë të sigurta 24/7, dhe pezullimi i lejeve të reja ndërtimore për 6 muajt e parë, si pjesë e planit “Nga betoni te komuniteti”.
Në faqen e fundit gjenden udhëzimet për mënyrën e votimit më 12 tetor, si dhe një karikaturë që pasqyron përjetimet e përditshme të qytetarëve të Prishtinës.